სიმღერები ძალიან პრაქტიკულ, ბავშვებისთვის ადვილად აღსაქმელ თემებზეა აგებული. მაგალითად ხელების დაბანა, სადილისთვის მოსამზადებელი სიმღერა, რიგში ერთმანეთის დალოდება,სათამაშოების ალაგება, ჩაცმა და ა.შ. ასევე ისეთი თემები რაც ბავშვებისთვის ასაკობრივად საინტერესოა ცხოველები, ფრინველები, დინოზავრები, მეგობრები, ერთმანეთის პატივისცემა, ანბანი, ციფრები და ა.შ. დღე ძირითადად სიმღერით იწყება და სიმღერით მთავრდება.

სიმღერით აქტივობების დაწყება და დასრულება ასევე დამახასიათებელია სხვადასხვა ტიპის გასართობ თუ სპორტულ წრეებზე. მაგალითად 4 წლის ალმა ცურვაზე დადის, სანამ პედაგოგი ცურვის სავარჯიშოებს იწყებს, ბავშვებს სიმღერით ესალმება წყალში და ცურვის გაკვეთილსაც სიმღერით ასრულებს.

საბავშვო სიმღერები ბავშვიან ოჯახებშიც აქტიურად გამოიყენება. ამას ბავშვის დაბადებიდანვე უწყობენ ხელს. მაგალითად საბავშვო პოლიკლინიკები ახლად დაბადებული ბავშვებისთვის მუსიკალურ შეხვედრებს აწყობენ. მშობლები შვილებთან ერთად საბავშვო სიმღერებს ეცნობიან და ბავშვებისთვის მღერიან.

კი მაგრამ, რატომ ასეთი მაღალი დოზით სიმღერა ბავშვის ყოველდღიურ ცხოვრებაში? არა ერთი მეცნიერული კვლევა ადასტურებს თუ რამხელა მნიშვნელობა აქვს სიმღერას ბავშვის განვითარების პროცესში. სიმღერით სწავლება საკმაოდ აღიარებული მეთოდია, რომელიც არა ერთი უნარის განვითარებას უწყობს ხელს. სიმღერა მეტყველების განვითარებისთვის მნიშვნელოვანი ინსტრუმენტია, სიმღერას შემოაქვს ხალისი აქტივობებში. ხშირად სიმღერა ხდება ასევე ბავშვების აქტივობებში ჩართულობის, ინკლუზიის ერთ-ერთი საშუალება.

თედოს და ნუცას მუსიკალური თავგადასავლის იდეაც სწორედ ამ გამოცდილებით დაიბადა. ჩემი ბაღში მუშაობის პერიოდს დაემთხვა თედოს დაბადება, საკუთარმა შვილმაც დამანახა თუ რამხელა მნიშვნელობა ჰქონდა განსაკუთრებით მეტყველების განვითარების პროცესში სიმღერებს. როგორ უადვილებდა თედოს სიმღერა და მელოდია სიტყვების გამოთქმას. ამ პერიოდში გავეცანი აქტიურად მუსიკალურ ბარათებად დაბეჭდილ წიგნებს, რომელსაც საბავშვო ბაღში და სახლშიც ძალიან აქტიურად ვიყენებდით. ბარათებად დაბეჭდილი წიგნები შედგება თემატური ილუსტრირებული ბარათებისგან, ბარათების ერთ მხარეს ილუსტრაციებია, ხოლო მეორე მხარეს სიმღერის ტექსტი. ასევე სიმღერები დისკის ან სპეციალური კოდის სახით მოჰყვება.

ბავშვები ირჩევენ თემატურ ბარათებს, საუბრობენ ილუსტრაციის გარშემო პედაგოგთან/მშობელთან ერთად, მღერიან სიმღერას, აკეთებენ მოძრაობებს სიმღერის ტექსტის შესაბამისად.

რაც უფრო პრაქტიკულ თემებზეა აწყობილი სიმღერები მით უფრო მარტივია ყოველდღიურ აქტივობებში მათი გამოყენება. ასევე ძალიან ეხმარება ბავშვებს მეტყველების განვითარების პროცესში.

ასე რომ თუ შენ ხარ სკოლამდელი ასაკის ბავშვის მშობელი ან საბავშვო ბაღის პედაგოგი ვფიქრობ მუსიკალური აპლიკაცია «თედო და ნუცა», რომელიც შედგება ილუსტრირებული ბარათებისგან და სიმღერებისგან, გამოგადგება ბავშვებთან ერთად სხვადასხვა აქტივობების განხორციელების დროს.  

თამარ ლორია

2023 წ.